Zehno’n Mein Bigaad – Asif Barkhiya Ghazal

/Ghazal/

Dil daagdaar hai apni hi andhi rawish se
Nifaaq hai ajab sa har galat khwahish se

Akhlaaq ke na hone mein hai sab fasaad
Shararat hai shaitaani kaise har saazish se
Shubhaat se afsaane tafraqa se kasheedgi
Tamashaa hai barham har ek ranjish se.

Zehno’n mein bigaad ho to kya kiya jaye
Har gunah uljhaaye hai apni kashish se
Kis se puchey ab kisi ko kaise samjhaa’en
Har ek ka aalam hai apni apni gardish se.

Laa-ilmi se jahalat aur guroor se hai ana
Fitna hi fitna hai yahan har ek lagzish se
Khutbaat apni jagah vaaiz ka kya qusoor
Sun kar bhi be-asar hai koi apni khalish se.

Na Koi Shohrat chaiye – Asif Barkhiya Ghazal

/Ghazal/

Mujhey fan-e- shaa’eri se na koi shuhrat chahiyeh
Mere ash’aar mein na wazn wo bahr se nusrat chahiyeh.

Koi dooba hai aalam-e-afkaar wo tasawwuraat mein
Main duur hi sahih mujhey na wahshat chahiyeh
Koi pareshaan hai apne naqis khwaabon ko lekar
Mera kalaam hai saada mujhey sirf sadaqat chahiyeh.

Suna hai hum ne bhi mashoor shaairon ki zubaani
Un jaisa hum ko na naamwaree wo wajaahat chahiyeh
Sukhan wo paigaam apna hai auron se mukhtalif
Baat hai haqq ki phir hum ko haqeeqat chahiyeh.

Gamgeen ghazlon wo gumraah nagmon se kya waasta
Hum ko apni nafs ki lagzishon se na koi illat chahiyeh
Kaise kaise hain bikhrey huwe khayalaat ki waadiyaan
Isi liye hum ko bad-kalaami se na koi zillat chahiyeh.

Ya Rabb! Koi marsiya se to koi junoon se taar-taar hai
Hum ko raah-e-raast se faqat achchi aaqibat chahiyeh
Be-tukee shaa’eri se  to behtar hai ash’aar-e-hikmat
Saadiq alfaaz ki rawaanee se hum ko nisbat chahiyeh.