Jab Se Tu Amil e Farmooda e Islaf Nahi
Naam Insaf Ka Baqi Hai Per Insaf Nahi
Zarb e Shamsheer, Baja! Nara e Takbeer Darust
Sab Hai! Bus Tujh Mein Mujahid Se Woh Ausaf Nahi
Kya Bahana Hai Mere Qalb Ko Thukrane Ka
Kirchiyan Dekh Ke Kehte Hain Ke Shafaaf Nahi
Ya Khuda! Umat e Ahmed Bhi Wohi Tu Bhi Wohi
Kya Sabab Hai Ke Woh Pehle Ke Se Altaf Nahi
Aah! Yeh Ishq Bhi Kasa Hai Tera Jis Mein ‘Shakeeb’
Ishq Ka Aieen Nahi Sheen Nahi Qaaf Nahi
